Creei Contomelar para comentar sobre as meteduras de pata que se fan, non só en Sofán, senón en toda esta España chamada país.
Escollín o título de Contomelar polo seu significado, na nosa lingua nai, de traer contos e chismes. Asemade, resucito esta verba tan fermosa que o Dicionario da Real Academia Galega empeñouse en asasinar.
En fin, así foi como o blogue acabou por converterse no que é, unha mirandola para criticar e contomelar cousas que teñan a súa retranca. 
Tamén quero presentarvos a Cheíño de Tó, un personaxe creado para que me axude a analizar a vida cotiá do concello arteixán no blogue ARTEixolandia. Un blogue local onde vou plasmando a realidade municipal nunhas viñetas cun enfoque humorístico, respectuoso e con moita retranca. O obxectivo é demostrar ao mundo a través da rede que os veciños de Arteixo temos bo humor, polo que intento ofrecer unha imaxe distinta da habitual crispación, grosería e malos modos dos políticos.
As ideas para as viñetas, con nome propio, atópoas principalmente nas novas que saen a través das redes sociais e dos medios de comunicación, polo que só son responsábel de reflectir con retranca as súas partidistas opinións. 
Intento deixar a un lado as miñas convicións políticas para arremeter, principalmente, contra quen se atope no poder, sexa dun ou doutro partido.
Así que quedades convidados a dar un paseo por ARTEixolandia, aínda que chova!


Jujobaca